തുറയൂർ: പാലച്ചുവടിൽ വെച്ച് ബൈക്ക് യാത്രക്കാരനായ യുവാവിനെ കാറിടിച്ച് വീഴ്ത്തി നിർത്തിപ്പോയ സംഭവം വാഹനം പയ്യോളി പോലീസ് കസ്റ്റഡിയിലെടുത്തു. ഇരിങ്ങത്ത് താനിയുള്ള പറമ്പിൽ അക്ഷയ് കുമാർ (28) ഓടിച്ച കാറാണ് അപകടമുണ്ടാക്കിയതെന്ന് പോലീസ് സ്ഥിരീകരിച്ചു.

​സെപ്റ്റംബർ അഞ്ചിന് രാത്രി ഏഴരയോടെയാണ് സംഭവം. റോഡരികിൽ നിർത്തിയിട്ട ബൈക്കിൽ ചാരിനിൽക്കുകയായിരുന്ന ഇടിഞ്ഞകടവ് സ്വദേശി മിദ്‌ലാജിനെ പയ്യോളി ഭാഗത്തുനിന്ന് അമിതവേഗതയിലെത്തിയ കാർ ഇടിച്ചുതെറിപ്പിക്കുകയായിരുന്നു. അപകടത്തിന് ശേഷം മേപ്പയൂർ ഭാഗത്തേക്ക് നിർത്താതെ പോകുകയായിരുന്നു.

​സി.സി.ടി.വി ദൃശ്യങ്ങളും സോഷ്യൽ മീഡിയയും കേന്ദ്രീകരിച്ച് പയ്യോളി പോലീസ് നടത്തിയ ഊർജ്ജിതമായ അന്വേഷണത്തിനൊടുവിലാണ് വാഹനം തിരിച്ചറിഞ്ഞത്. പയ്യോളി-പേരാമ്പ്ര റോഡിലെ കീഴൂർ മുതൽ മേപ്പയ്യൂർ വരെയുള്ള 15-ഓളം സി.സി.ടി.വി ക്യാമറകൾ പോലീസ് പരിശോധിച്ചിരുന്നു. തുടർന്ന് സംശയാസ്പദമായ കാറിന്റെ ചിത്രങ്ങൾ പ്രദേശത്തെ വാട്‌സ്ആപ്പ് ഗ്രൂപ്പുകൾ വഴി  പ്രചരിപ്പിച്ചതാണ് പ്രതിയെ കുടുക്കാൻ സഹായിച്ചത്.

​അപകടത്തിൽ ഗുരുതരമായി പരിക്കേറ്റ മിദ്‌ലാജ് നിലവിൽ കൊയിലാണ്ടി താലൂക്ക് ആശുപത്രിയിൽ ചികിത്സയിലാണ്. കാലിന് സാരമായി പരിക്കേറ്റ ഇദ്ദേഹം കോഴിക്കോട് മെഡിക്കൽ കോളേജിലും സ്വകാര്യ ആശുപത്രിയിലും പ്രവേശിപ്പിക്കപ്പെടുകയും ശസ്ത്രക്രിയയ്ക്ക് വിധേയനാവുകയും ചെയ്തിരുന്നു.