കൊയിലാണ്ടി: കണയങ്കോട് പുഴക്കരയിലേക്ക് സിമൻ്റ് ലോറി മറിഞ്ഞ് ഡ്രൈവർക്ക് പരിക്ക്. ഇന്ന് പുലർച്ചെ 3 മണിയോടുകൂടിയാണ് അപകടം ഉണ്ടായത്. താമരശ്ശേരി ഭാഗത്ത് നിന്ന് കൊയിലാണ്ടി ഭാഗത്തേക്ക് അൾട്രാ ടെക് കമ്പനിയുടെ സിമൻ്റുമായി വരികയായിരുന്ന ലോറി കുട്ടോത്ത് വളവിൽ എത്തിയപ്പോഴാണ് സൈൻബോർഡ് തകർത്ത് നേരെ പുഴക്കരയിലേക്ക് പതിക്കുകയായിരുന്നു. ഇടിയുടെ ആഘാതത്തിൽ ഒരു തെങ്ങ് മുറിഞ്ഞ് ലോറിയുടെ മുകളിൽവീണു.
പരിക്കേറ്റ ഡ്രൈവറെ അതുവഴി പോകുകയായിരുന്ന ടൂറിസ്റ്റ് വാഹനത്തിലെ നാലോളം ചെറുപ്പക്കാരും സമീപ വാസികളും ചേർന്ന് പുറത്തെടുത്ത് ആശുപത്രിയിൽ എത്തിച്ചു. അബോധാവസ്ഥയിലായിരുന്നതിനാൽ മെഡിക്കൽ കോളെജിൽ പ്രവേശിപ്പിച്ചു. കൊയിലാണ്ടിയിൽ നിന്നും അഗ്നി രക്ഷാ സേനയെത്തി പരിശോധന നടത്തി.
