കൂത്തുപറമ്പ് : സാമൂഹിക സേവന പ്രവർത്തനങ്ങളിൽ മാതൃകാപരമായി പ്രവർത്തിക്കുന്ന ലയൺസ് ഇൻറർനാഷണൽ ഡിസ്ട്രിക്ട് 318 E ജന്മനാ അംഗഹീനരായവർക്കും അപകടങ്ങളിലൂടെയോ പ്രമേഹത്തിൻറെ പിടിയിലൂടെയോ കാലുകൾ നഷ്ടപ്പെട്ടവർക്കും വേണ്ടി കൃത്രിമ കാലുകൾ സൗജന്യമായി വിതരണം ചെയ്യുന്ന പ്രത്യേക ക്യാമ്പ് സംഘടിപ്പിക്കുന്നു. ഡിസംബർ 16 മുതൽ 25 വരെ കൂത്തുപറമ്പ് ലയൺസ് ക്ലബ്ബിന്റെ ആസ്ഥാനമായ റോറിങ് റോക്കിൽ ക്യാമ്പ് നടക്കും.
മാഹി ഉൾപ്പെടെ കണ്ണൂർ, കാസർകോട്, കോഴിക്കോട്, വയനാട് ജില്ലകളിലായി പ്രവർത്തിക്കുന്ന ഈ സംഘടന, ശാരീരിക വൈകല്യങ്ങൾ മൂലമുള്ള ദുഃഖങ്ങൾ അനുഭവിക്കുന്നവരെ ജീവിതത്തിലേക്ക് തിരിച്ചെത്തിക്കുന്നതിനായി ഒരു വലിയ സംരംഭം ഏറ്റെടുത്തിരിക്കുകയാണ്. കുടുംബത്തിന്റെ ദൈനംദിന ചെലവുകൾക്കും മക്കളുടെ വിദ്യാഭ്യാസത്തിനുമുള്ള ബുദ്ധിമുട്ടുകളെ മറികടക്കാൻ ഈ കൃത്രിമ കാലുകൾ പുതിയ പ്രതീക്ഷ നൽകും.
ക്യാമ്പിൽ പങ്കെടുക്കുന്നവർക്ക് സൗജന്യ കൃത്രിമ കാലുകൾ ലഭ്യമാക്കുന്നതിനൊപ്പം, മുമ്പ് വച്ചുപയോഗിച്ച കൃത്രിമ കാലുകളിൽ ഉണ്ടായ കേടുപാടുകൾ പരിഹരിക്കുന്നതിനുള്ള സൗകര്യവും ഒരുക്കിയിട്ടുണ്ട്. ഗുണഭോക്താക്കളുടെ എണ്ണം പരിഗണിച്ച് എല്ലാ ആവശ്യക്കാരും സേവനം ലഭിക്കുന്നതിനുള്ള ക്രമീകരണമാണ് സംഘാടകർ നടത്തുന്നത്.
ക്യാമ്പിൽ പങ്കെടുക്കാൻ ആഗ്രഹിക്കുന്നവർ അവരുടെ പേര്, വയസ്സ്, സ്ഥലം, ഫോൺ നമ്പർ, മേൽവിലാസം എന്നിവ 9447853586, 9961928858 എന്നീ നമ്പറുകളിൽ വിളിച്ച് രജിസ്റ്റർ ചെയ്യണം. ക്യാമ്പിൽ വരുമ്പോൾ പാസ്പോർട്ട് സൈസ് ഫോട്ടോയും ഐഡന്റിറ്റി കാർഡിന്റെ കോപ്പിയും കൊണ്ടുവരണം. ഗുണഭോക്താക്കൾ അവരുടെ പ്രദേശത്തെ ലയൺസ് ക്ലബ്ബുമായി ബന്ധപ്പെട്ട് കൂടുതൽ വിവരങ്ങൾ അറിയുകയും രജിസ്ട്രേഷനിൽ സഹായം നേടുകയും ചെയ്യാവുന്നതാണ്.
നിർദ്ദേശങ്ങൾ അനുസരിച്ചായിരിക്കും ക്യാമ്പ് നടത്തപ്പെടുക. ഇതിനർഹരായ ഗുണഭോക്താക്കൾ ഈ അവസരം പരമാവധി പ്രയോജനപ്പെടുത്തണമെന്ന് സംഘാടകർ അറിയിച്ചു.
