തിരുവനന്തപുരം∙ മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയിലും അയ്യങ്കാളി നഗര തൊഴിലുറപ്പ് പദ്ധതിയിലും 100 പ്രവൃത്തി ദിനങ്ങൾ പൂർത്തിയാക്കിയ എല്ലാ തൊഴിലുറപ്പ് തൊഴിലാളികൾക്കും ഓണം പ്രമാണിച്ച് 1000 രൂപ ഉത്സവബത്തയായി നൽകുമെന്ന് ധനമന്ത്രി കെ.എൻ. ബാലഗോപാൽ അറിയിച്ചു. 4.6 ലക്ഷം ആളുകളിലേക്കാണ് സഹായമെത്തുക. ഇതിനായി 46 കോടി രൂപ ധനവകുപ്പ് അനുവദിച്ചു.സർക്കാർ ജീവനക്കാർ‌ക്ക് കഴിഞ്ഞ ഓണത്തിനു നൽകിയ അതേ ബോണസും ഉത്സവബത്തയും ഇക്കുറിയും നൽകുമെന്ന് സർക്കാർ കഴിഞ്ഞ ദിവസം അറിയിച്ചിരുന്നു. ബോണസായി 4,000 രൂപയും ബോണസിന് അർഹത ഇല്ലാത്തവർക്ക് ഉത്സവബത്തയായി 2,750 രൂപയും നൽകുമെന്നാണ് മന്ത്രി കെ.എൻ.ബാലഗോപാൽ അറിയിച്ചത്. സർവീസ് പെൻഷൻകാർക്കും പങ്കാളിത്ത പെൻഷൻ പദ്ധതി പ്രകാരം വിരമിച്ച ജീവനക്കാർക്കും പ്രത്യേക ഉത്സവബത്തയായി 1,000 രൂപ നൽകും. ആവശ്യപ്പെടുന്ന എല്ലാ സർക്കാർ ജീവനക്കാർക്കും ഓണം മുൻകൂറായി (അഡ്വാൻസ്) 20,000 രൂപ അനുവദിക്കുമെന്നും അറിയിച്ചിരുന്നു.
