ആറര പതിറ്റാണ്ടിന്റെ കാത്തിരിപ്പിന്നൊടുവിലാണ്‌ 2023 സെപ്‌തംബർ 14ന് ഭൂനിയമ ഭേദഗതി പാസാക്കിയത്. ബിൽ അവതരിപ്പിച്ച് മൂന്നരമാസം കഴിഞ്ഞിട്ടും ഒപ്പിടാൻ ഗവർണർ തയാറായിട്ടില്ല. ആർ ശങ്കറും കെ കരുണാകരനും മുഖ്യമന്ത്രിമാരായിരിക്കെ കൊണ്ടുവന്ന ഭൂ നിയമങ്ങളാണ്‌ പിന്നീട്‌ ലക്ഷക്കണക്കിന്‌ കർഷകരുടെ ജീവിതം വഴിമുട്ടാനിടയായത്‌. എല്ലാ വിഭാഗങ്ങൾക്കും പ്രയോജനകരമാകുന്ന കൃഷിയോടൊപ്പം അനുബന്ധ നിർമാണ പ്രവർത്തനങ്ങൾകൂടി സാധൂകരിക്കുന്നതിനുള്ള ഭൂനിയമ ഭേദഗതിയാണ്‌ പാസാക്കിയിട്ടുള്ളത്‌. ആശുപത്രിയടക്കം പൊതുസ്ഥാപനങ്ങളുടേയും പ്രവർത്തനം സാധ്യമാക്കുന്ന തരത്തിൽ നിർമാണം അനുവദിച്ചുകൊടുക്കുന്നതാണ്‌ ഭേദഗതി ബിൽ. എന്നാൽ കർഷക വിരുദ്ധരും അരാഷ്‌ട്രീയ വാദികളുമായ ചില പിരിവ്‌ സംഘടനാ ഭാരവാഹികളും ബില്ലിൽ ഒപ്പിടരുതെന്ന നിവേദനം നൽകിയിട്ടുണ്ട്‌. ഇടുക്കി ജനതയെ ഭിന്നിപ്പിക്കുകയാണ്‌ ഗവർണറുടെ ലക്ഷ്യമെന്നും അതുകൊണ്ടാണ്‌ രാജ്‌ഭവൻ മാർച്ച്‌ ദിവസംതന്നെ ഇടുക്കിയിലെത്തുന്നതെന്നും എൽഡിഎഫ് നേതാക്കൾ ആരോപിച്ചു.
