അടുക്കള ബജറ്റിൻ്റെ താളംതെറ്റിച്ച് തക്കാളി വില വീണ്ടും കുതിച്ചുയരുന്നു. ഉൽപാദന സ്ഥലങ്ങളിലെ കാലാവസ്ഥാ മാറ്റവും മാർക്കറ്റിൽ തക്കാളി വരവ് കുറഞ്ഞതും വില വർധിക്കാൻ കാരണമായതായി കച്ചവടക്കാർ പറഞ്ഞു. ചില സംസ്ഥാനങ്ങളിൽ വില കിലോയ്ക്ക് 100 രൂപയ്ക്ക് അടുത്തെത്തി. മഹാരാഷ്ട്രയിൽ കഴിഞ്ഞ 15 ദിവസത്തിനിടെ കൂടിയത് 40 ശതമാനമാണെങ്കിൽ ഡൽഹിയിൽ 25 ശതമാനത്തിലധികം.
കിലോയ്ക്ക് കഴിഞ്ഞമാസം ശരാശരി 35-36 രൂപനിരക്കിലായിരുന്ന വില പലയിടത്തും 46 രൂപയ്ക്കടുത്തായെന്ന് കേന്ദ്ര ഉപഭോക്ത മന്ത്രാലയത്തിൻ്റെ റിപ്പോർട്ട് വ്യക്തമാക്കുന്നു. ചണ്ഡീഗഡ്, ആന്ധ്രാപ്രദേശ്, ഹിമാചൽ പ്രദേശ്, കർണാടക എന്നിവിടങ്ങളിൽ വില വർധന 40 മുതൽ 110% വരെ. വിവാഹ, ക്രിസ്‌മസ്-പുതുവത്സര സീസൺ അടുത്തിരിക്കേയുള്ള വില വർധന ഉപഭോക്താക്കൾക്കും ഹോട്ടലുകൾക്കും തിരിച്ചടിയാകും.
