തിരുവനന്തപുരം> ക്രിസ്‌മസ്‌, പുതുവത്സര സീസണിൽ ബിവറേജസ്‌ കോർപറേഷൻ വിറ്റത് 543.13 കോടി രൂപയുടെ മദ്യം. ഡിസംബർ 22 മുതൽ 31 വരെയുള്ള ദിവസങ്ങളിലെ വിൽപനയാണിത്‌. കഴിഞ്ഞവർഷം 516.26 കോടി രൂപയുടെ വിൽപ്പനയാണ്‌ ഈ സീസണിൽ ലഭിച്ചത്‌. ഇത്തവണ ഡിസംബർ 31ന്‌ മാത്രം 94.54 കോടി രുപയുടെ മദ്യംവിറ്റു.
കഴിഞ്ഞവർഷം ഇത് 93.33 കോടിയായിരുന്നു. 24ന്‌ 70.73 കോടിയുടെ മദ്യ വിൽപ്പനയാണുണ്ടായത്‌. പുതുവത്സരത്തിന്റെ തലേദിവസം കൂടുതൽ മദ്യം വിറ്റത് തിരുവനന്തപുരം പവർ ഹൗസ് റോഡിലെ ഔട്ട് ലെറ്റിലാണ്. ഇവിടെ 1.02 കോടി രൂപയുടെ വിൽപനയാണ്‌ ലഭിച്ചത്‌. എറണാകുളം രവിപുരം–-77 ലക്ഷം, ഇരിങ്ങാലക്കുട– 76 ലക്ഷം, കൊല്ലം ആശ്രാമം- 73 ലക്ഷം, പയ്യന്നൂർ– 71 ലക്ഷം എന്നിങ്ങനെയാണ് മറ്റ്‌ ഔട്ട്‌ലെറ്റുകളിലെ വിൽപന.
