കൊച്ചി: വിദ്യഭ്യാസ ഘട്ടത്തിൽപ്രധാന കടമ്പയായി പൊതുവേ കണക്കാക്കപ്പെടുന്ന ഒന്നാണ് പത്താം ക്ലാസ്. എസ്എസ്എൽസി ഫലം വന്ന് കഴിഞ്ഞതോടെ വിദ്യാർഥികളെല്ലാം ഉന്നത വിദ്യാഭ്യാസത്തിനുള്ള തയ്യാറെടുപ്പിലാണ്. ഇന്നലെ എസ്എസ്എൽസി റീവാല്യുവേഷൻ റിസൾട്ടും വന്ന് കഴിഞ്ഞു. പത്താം ക്ലാസ് റിസൾട്ട് വന്നയുടൻ തന്നെ പ്ലസ് വൺ പ്രവേശന നടപടികൾ ആരംഭിച്ചിരുന്നു. എന്നാൽ പ്ലസ് വൺ അല്ലാതെ നിരവധി ഓപ്ഷനപുകൾ വിദ്യാർഥിൾക്ക് മുന്നിലുണ്ട്.

പത്താം ക്ലാസ് റിസൾട്ട് പോലെ തന്നെ ഉന്നത പഠവും വിദ്യാർഥികള്‍ക്കും രക്ഷിതാക്കള്‍ക്കും ആശങ്കയുടെ കാലമാണ്. ഇനിയേതു കോഴ്‌സ് തിരഞ്ഞെടുക്കണമെന്ന ചോദ്യമാണ് പലരേയും വലയ്ക്കുന്നത്. ജോലിസാധ്യതയ്ക്കു മുന്‍തൂക്കം നല്‍കണമെങ്കിലും തങ്ങളുടെ അഭിരുചി ഏതു മേഖലയിലാണ് എന്നതുകൂടി മുഖവിലക്കെടുത്ത് വേണം കോഴ്സുകൾ തെരഞ്ഞെടുക്കാൻ. എസ്എസ്എൽസി പാസായവർക്കുള്ള ഓപ്ഷനുകൾ ഇതാ.

പ്ലസ് വൺ (ഹയർ സെക്കണ്ടറി) പ്രവേശനം

എസ്എസ്എൽസി കഴിഞ്ഞാൽ ബഹുഭൂരിപക്ഷം വിദ്യാർഥികളും പ്ലസ് വൺ തന്നെയാണ് ആദ്യ ഓപ്ഷനായി കാണുന്നത്. സയൻസ്, കൊമേഴ്സ്, ആർട്സ് എന്നിങ്ങനെ

മൂന്ന് സ്ട്രീമുകളിൽ പ്ലസ് വൺ പഠിക്കാം. ഭാവിയിൽ എന്ത് ഉന്നത വിദ്യാഭ്യാസം ആഗ്രഹിക്കുന്നുവോ അതിനനുസരിച്ചുള്ള സ്ട്രീം തെരഞ്ഞെടുക്കാൻ ശ്രദ്ധിക്കണം. വൊക്കേഷണൽ/ടെക്നിക്കൽ ഹയർ സെക്കൻഡറി കോഴ്സുകളും ലഭ്യമാണ്. ഇവയിൽ തൊഴിൽ ലക്ഷ്യമിട്ടുള്ള വിഷയങ്ങളും പഠിക്കാം.

പത്താം ക്ലാസ് കഴിഞ്ഞാൽ ഡിപ്ലോമ/പോളിടെക്നിക് കോഴ്സുകൾ

സിവിൽ, മെക്കാനിക്കൽ, ഇലക്ട്രിക്കൽ, ഇലക്ട്രോണിക്സ്, കമ്പ്യൂട്ടർ സയൻസ് തുടങ്ങിയ മേഖലകളിൽ മൂന്നു വർഷത്തെ ഡിപ്ലോമ കോഴ്സുകൾ പത്താം ക്സാസ് യോഗ്യതയിൽ ലഭ്യമാണ്. ഫോട്ടോഗ്രഫി, ത്രിഡി അനിമേഷൻ, ഫുട്വെയർ ടെക്നോളജി, അഗ്രികൾച്ചർ തുടങ്ങിയ ഹ്രസ്വ കാലയളവിലുള്ള ഡിപ്ലോമകളും ഉണ്ട്.

പത്താം ക്ലാസ് പൂർത്തിയായാൽ ഐടിഐ/വൊക്കേഷണൽ കോഴ്സുകൾ

ഐടിഐ കോഴ്സുകൾ (Industrial Training Institutes) വലിയ തൊഴിൽ സാധ്യതകൾ നൽകുന്നു. നഴ്സിങ്, അധ്യാപനം, പാരാമെഡിക്കൽ തുടങ്ങിയ വിവിധ വൊക്കേഷണൽ കോഴ്സുകൾ ലഭ്യമാണ്.

സർട്ടിഫിക്കേഷൻ കോഴ്സുകൾ

കമ്പ്യൂട്ടർ ആപ്ലിക്കേഷൻ, പ്രോഗ്രാമിങ്, ഡിജിറ്റൽ മാർക്കറ്റിങ്, വിദേശ ഭാഷാ പഠനം തുടങ്ങിയ കോഴ്സുകൾ ചെറുകാലയളവിൽ പൂർത്തിയാക്കാം.

മറ്റു സാധ്യതകൾ

പാരാമെഡിക്കൽ, ഹോട്ടൽ മാനേജ്മെൻ്റ്, ഹെൽത്ത് കെയർ തുടങ്ങിയ മേഖലകളിൽ ഡിപ്ലോമ കോഴ്സുകൾ ലഭ്യമാണ്. എസ്എസ്എൽസി കഴിഞ്ഞു എന്നതിനു ശേഷം താല്പര്യം, കഴിവ്, ഭാവി എന്നിവ അടിസ്ഥാനമാക്കിയാണ് പ്ലസ് വൺ, ഡിപ്ലോമ, വൊക്കേഷണൽ കോഴ്സ്, സർട്ടിഫിക്കേഷൻ കോഴ്സ്, അല്ലെങ്കിൽ തൊഴിൽ പരിശീലനം തുടങ്ങിയവ തെരഞ്ഞെടുക്കേണ്ടത്. ഏത് ഓപ്ഷൻ തെരഞ്ഞെടുത്താലും, അത് നിങ്ങളുടെ കഴിവുകൾക്കും ലക്ഷ്യങ്ങൾക്കും യോജിച്ചതായിരിക്കണം.