സംസ്ഥാനത്ത് വ്യവസായ സംരംഭങ്ങൾക്ക് ഇനി വേഗത്തിൽ അനുമതി കിട്ടും. കെ-സ്വിഫ്റ്റ്, എന്‍എസ് ഡബ്ല്യുഎസ് പോര്‍ട്ടലുകളാണ് ഇതിനായി ഏകോപിപ്പിക്കുന്നത്. ഈ സൈറ്റുകൾ ഏകോപിപ്പിച്ച് പ്രവർത്തിക്കാൻ തുടങ്ങുന്നതിനാൽ സംരംഭങ്ങൾക്കായുള്ള കേന്ദ്ര-സംസ്ഥാന അനുമതികള്‍ എളുപ്പത്തിലാകും. കേരളത്തിന്‍റെ ഈസ് ഓഫ് ഡൂയിങ് ബിസിനസ് പോര്‍ട്ടലായ കെ-സ്വിഫ്റ്റ്, ദേശീയ ഏകജാലക സംവിധാനമായ എന്‍എസ് ഡബ്ല്യുഎസുമായാണ് സംയോജിപ്പിക്കുന്നത്. ഇത് ഈ വകുപ്പുകളുടെ ഏകോപനം എളുപ്പത്തിലാക്കും. കൂടുതൽ വ്യവസായ സംരംഭങ്ങളുടെ അനുമതിയും എളുപ്പത്തിലാകും. വ്യവസായ സംരംഭങ്ങള്‍ ആരംഭിക്കുന്നതിനുള്ള കാലതാമസം ഒഴിവാക്കാനാകും എന്നതാണ് പധാന സവിശേഷത. ഒന്നിലധികം അനുമതികള്‍ നേടുന്നതിലെ സങ്കീര്‍ണത ഒഴിവാക്കാൻ ആകും.
കേന്ദ്ര-സംസ്ഥാന വകുപ്പുകള്‍ തമ്മിലുള്ള അനുമതി ത്വരിതപ്പെടുത്തുന്നതിനും ഈ വകുപ്പുകളുടെ ഏകോപനം സഹായകരമാകും. ഏകീകൃതവും കാര്യക്ഷമവുമായ ക്ലിയറന്‍സ് പ്രക്രിയ ഉറപ്പാക്കാൻ ആകും.എന്‍എസ് ഡബ്ല്യുഎസ് അനുമതിയുടെ തുടര്‍ച്ചയായി സംസ്ഥാനത്തു നിന്നുള്ള സേവനങ്ങള്‍ക്കായി
കെ-സ്വിഫ്റ്റ് പോര്‍ട്ടല്‍ (https://kswift.kerala.gov.in/index/) ഉപയോഗിക്കും. നിക്ഷേപകര്‍ക്ക് ഇത് പ്രയോജനപ്പെടുത്താനാകും. എന്‍എസ് ഡബ്ല്യുഎസ് പ്ലാറ്റ് ഫോമില്‍ “നോ യുവർ അപ്രൂവൽ’ വിഭാഗം ഉണ്ട്. ഇതില്‍ 32 കേന്ദ്ര വകുപ്പുകള്‍ക്കുള്ള മാര്‍ഗനിര്‍ദ്ദേശങ്ങൾ ഉള്‍പ്പെടുന്നു. ഇതിലൂടെ നിക്ഷേപകര്‍ക്ക് കേരളത്തിലെ ബിസിനസ് പ്രവര്‍ത്തനങ്ങള്‍ക്ക് ആവശ്യമായ അംഗീകാരങ്ങള്‍ അറിയാം. സംസ്ഥാന ക്ലിയറന്‍സുകള്‍ നേടുന്നതിന് കെ-സ്വിഫ്റ്റ് ഉപയോഗിക്കാം.
എന്താണ് പുതിയ സംവിധാനങ്ങളുടെ മെച്ചം?
ഒന്നിലധികം ലോഗിനുകളില്ലാതെ എന്‍എസ് ഡബ്ല്യുഎസിന്‍റെയും കെ-സ്വിഫ്റ്റിന്‍റെയും അനുമതി ഇതിലൂടെ ലഭ്യമാണ്. വിവിധ വകുപ്പുതല ക്ലിയറന്‍സുകള്‍ക്കായി ഒറ്റ അപേക്ഷ മതി. രണ്ട് കോമണ്‍ ആപ്ലിക്കേഷന്‍ ഫോറത്തിലേക്ക് (സിഎഎഫ്) എളുപ്പത്തില്‍ പ്രവേശനം ലഭിക്കുന്നു. രണ്ട് പ്ലാറ്റ് ഫോമുകളിലുമുള്ള അപേക്ഷകൾ നിക്ഷേപകര്‍ക്ക് ട്രാക്ക് ചെയ്യാനാകും.ഈസ് ഓഫ് ഡൂയിങ് ബിസിനസ് മെച്ചപ്പെടുത്തുന്നതിനുള്ള സംരംഭങ്ങളുടെ ഭാഗമായി കേരള സംസ്ഥാന വ്യവസായ വികസന കോര്‍പ്പറേഷന്‍ (കെഎസ്ഐഡിസി) നടപ്പാക്കിയ കെ-സ്വിഫ്റ്റ് (കേരള സിംഗിള്‍ വിന്‍ഡോ ഇന്‍റര്‍ഫേസ് ഫോര്‍ ഫാസ്റ്റ് ആന്‍ഡ് ട്രാന്‍സ്പരന്‍റ് ക്ലിയറന്‍സ്) വ്യവസായങ്ങള്‍ ആരംഭിക്കുന്നതിനും പ്രവര്‍ത്തിപ്പിക്കുന്നതിനും വിവിധ സര്‍ക്കാര്‍ വകുപ്പുകളില്‍ നിന്നുള്ള അനുമതികള്‍ നേടുന്നതിനുള്ള ഏകീകൃത സംവിധാനമാണ്. ഇന്ത്യയിലുടനീളം വ്യവസായങ്ങള്‍ക്ക് ആവശ്യമായ അപേക്ഷകള്‍ക്കും അനുമതികള്‍ക്കും നിക്ഷേപകരെ സഹായിക്കുന്നതിനായി രൂപകല്‍പ്പന ചെയ്തിരിക്കുന്ന കേന്ദ്രീകൃത ഡിജിറ്റല്‍ പ്ലാറ്റ് ഫോമാണ് എന്‍എസ് ഡബ്ല്യുഎ. ഇരു സൈറ്റുകളും സംയോജിപ്പിക്കുന്നത് സംരംഭകരുടെ നടപടിക്രമങ്ങൾ എളുപ്പമാക്കും
