പയ്യോളി : ദേശീയപാത വികസനത്തിന്റെ ഭാഗമായി അയനിക്കാട് ഹൈദ്രോസ് ജുമാഅത്ത് പള്ളി സ്റ്റോപ്പിനും അയ്യപ്പ ഭജന മഠത്തിനും സമീപം അടിപ്പാത നിർമിക്കണമെന്ന് ആവശ്യപ്പെട്ട് സംഘടിപ്പിച്ച ജനകീയ കൺവെൻഷനിൽ പ്രതിഷേധമിരമ്പി. അഞ്ചുവർഷത്തോളമായി വികസന പ്രവൃത്തികൾ പുരോഗമിക്കുന്നതിനിടയിൽ അടിപ്പാത വേണമെന്നാവശ്യപ്പെട്ട് പ്രദേശവാസികൾ അധികൃതരുടെ മുമ്പിൽ മുട്ടാത്ത വാതിലുകളില്ല . റോഡിൻറെ കിഴക്കും പടിഞ്ഞാറുമായി ഇരുപതോളം പള്ളി മഹല്ലുകളിലെ വിശ്വാസികൾ ഖബർസ്ഥാനായി (മൃതദേഹം മറവ് ചെയ്യാൻ ) ആശ്രയിക്കുന്നത് ഹൈദ്രോസ് ജുമാഅത്ത് പള്ളിയാണ്.
എന്നാൽ നിലവിൽ റോഡിൻറെ കിഴക്ക് ഭാഗത്തുള്ളവർക്ക് പ്രാർത്ഥനക്കായി പള്ളിയിലേക്ക് വരാനും മൃതദേഹം അടക്കം ചെയ്യാനുമെല്ലാം ഒന്നുകിൽ ഒരു കിലോമീറ്റർ അകലെയുള്ള പയ്യോളി ടൗണിൽ പോയി യു ടേൺ അടിച്ചുവരേണ്ട അവസ്ഥയാണ് . അയനിക്കാട് പള്ളിയുടെ ഇരുഭാഗത്തുമുള്ള ബസ്സ് സ്റ്റോപ്പുകളിലും ഇറങ്ങി മറുഭാഗത്തേക്ക് പോകേണ്ട യാത്രക്കാർക്കും സമാനമായ അവസ്ഥ തന്നെയാണ്. അതേപോലെ കിഴക്കുഭാഗത്തേക്ക് തിരിച്ചുപോകണമെങ്കിൽ രണ്ട് കിലോമീറ്റർ അകലെയുള്ള അയനിക്കാട് പോസ്റ്റ് ഓഫീസിനു സമീപം മാത്രമുള്ള അടിപ്പാത വഴി വേണം കിഴക്കുഭാഗത്തേക്ക് തിരിച്ചെത്താൻ .
പടിഞ്ഞാറുഭാഗത്ത് തന്നെയാണ് അയ്യപ്പഭജനമഠവും സ്ഥിതിചെയ്യുന്നത്. അതേപോലെ പടിഞ്ഞാറ് ഭാഗത്തുള്ളവർക്ക് കിഴക്കുഭാഗത്ത് സ്ഥിതി ചെയ്യുന്ന ഗവ. ഹോമിയോ ഡിസ്പെൻസറി , കൃഷിഭവൻ, ഗവ. വെൽഫെയർ എൽ.പി. സ്കൂൾ, എ. എൽ. പി സ്കൂൾ തുടങ്ങിയ സ്ഥാപനങ്ങളിൽ എത്തുവാനും ഒന്നുകിൽ പയ്യോളിയോ അല്ലെങ്കിൽ അയനിക്കാട് പോസ്റ്റ് ഓഫീസിന് സമീപത്തെ അടിപ്പാതയെയും ആശ്രയിക്കേണ്ട അവസ്ഥയിലാണ്. ഭാവിതലമുറക്ക് കൂടി തീരാദുരിതം സമ്മാനിക്കുന്ന നിലവിലെ അവസ്ഥക്ക് പരിഹാരം വേണമെന്നും , അടിപ്പാത അടിയന്തരമായി അനുവദിക്കണമെന്നും അയനിക്കാട് പള്ളിക്ക് സമീപം വിളിച്ചു ചേർത്ത ജനകീയ കൺവെൻഷൻ അധികൃതരോട് ആവശ്യപ്പെട്ടു.
ടെമ്പിൾ – മസ്ജിദ് അടിപ്പാത ആക്ഷൻ കമ്മിറ്റി സംഘടിപ്പിച്ച കൺവെൻഷൻ മുൻ എം.എ.ൽ.എ. കെ.ദാസൻ ഉദ്ഘാടനം ചെയ്തു. ഹക്കീം അധ്യക്ഷത വഹിച്ചു. മനോജ് തരിപ്പയിൽ വിഷയമവതരിപ്പിച്ചു. അഡ്വ: പി. കുൽസു , കെ.ടി.വിനോദ് , എൻ.സി.മുസ്തഫ, ബഷീർ മേലടി , സി.പി.രവീന്ദ്രൻ , ശശി തരിപ്പയിൽ, ഖാലിദ് , ഷൗക്കത്തലി തുടങ്ങിയവർ സംസാരിച്ചു.
