മൂടാടി: 79 -മത് സ്വാതന്ത്ര്യദിനാഘോഷം മൂടാടി കേളപ്പജി സ്മാരക വായനശാലയുടെ ആഭിമുഖ്യത്തിൽ സമുചിതമായി ആഘോഷിച്ചു. രാവിലെ എട്ടുമണിക്ക് വായനശാല പ്രസിഡണ്ട് വി വി ബാലൻ പതാക ഉയർത്തിയതോടെ ആഘോഷ പരിപാടികൾക്ക് തുടക്കം കുറിച്ചു. വൈകുന്നേരം 5 മണിക്ക് സ്വാതന്ത്ര്യ ദിനാഘോഷവും അടിയന്തരാവസ്ഥ വിരുദ്ധ സമര പോരാളി സംഗമവും നടന്നു. അടിയന്തരാവസ്ഥക്കെതിരായി സത്യഗ്രഹം നടത്തി അറസ്റ്റ് വരിച്ച് ജയിൽവാസം അനുഭവിച്ച പുത്തലത്ത് നാരായണൻ, പാലോളി രാഘവൻ, സി പി നാരായണൻ, പുതുവയൽ കുനി രാഘവൻ, അലിയങ്ങാട്ട് വിശ്വൻ, കൂടത്തിൽ രാജൻ എന്നിവർ സംഗമത്തിൽ പങ്കെടുത്തു.
അടിയന്തരാവസ്ഥയിലെ പോലീസ് മർദ്ദനവും. ജയിൽഅനുഭവങ്ങളും സമരപരിപാടികളും അന്ന് സമരത്തിന് നേതൃത്വം കൊടുത്ത പുത്തലത്ത് നാരായണൻ വിശദീകരിച്ചു. വായനശാല സെക്രട്ടറി പി കെ പ്രകാശൻ സ്വാഗതം ആശംസിച്ച ചടങ്ങിൽ വായനശാല പ്രസിഡൻ്റ് വി. വി. ബാലൻ അധ്യക്ഷത വഹിച്ചു. കെ കെ മുരളി മാസ്റ്റർ, രഘു കാവ്യാഞ്ജലി എന്നിവർ സംസാരിക്കുകയും ചെയ്തു. പായസ വിതരണത്തോടെ ആഘോഷ പരിപാടി സമാപിച്ചു.
