തൃശൂര്‍: എരുമപ്പെട്ടി കുണ്ടന്നൂരില്‍ പൊട്ടിവീണ വൈദ്യുതി കമ്പിയില്‍നിന്നു ഷോക്കേറ്റ് വീട്ടമ്മ മരിച്ചു. തെക്കേക്കര മാളിയേക്കല്‍ വീട്ടില്‍ ജൂലി (48) ആണു മരിച്ചത്. ഒപ്പമുണ്ടായിരുന്ന ഭര്‍ത്താവ് ബെന്നിക്കും ഷോക്കേറ്റു. പറമ്പിലെ മോട്ടോര്‍പുരയിലേക്ക് പോയിരുന്ന വൈദ്യുതി ലൈനാണു പൊട്ടിവീണത്. വീടിനോടു ചേര്‍ന്നുള്ള കൃഷിയിടത്തില്‍ പോയതായിരുന്നു ഇവര്‍.
വെള്ളിയാഴ്ച രാവിലെ 9.30-നായിരുന്നു സംഭവം. വീടിനോടു ചേർന്ന കൃഷിയിടത്തിൽ തേങ്ങ വീണുകിടന്നിരുന്നത് എടുക്കാൻ പോയതായിരുന്നു ജൂലിയും ബെന്നിയും. തോട്ടത്തിലെ മോട്ടോർ പുരയിലേക്കുള്ള വൈദ്യുതി ലൈൻ പൊട്ടിവീണുകിടന്നിരുന്നത് ഇവരുടെ ശ്രദ്ധയിൽപ്പെട്ടിരുന്നില്ല. ഷോക്കേറ്റ ജൂലിയെ ഉടന്‍ തന്നെ മെഡിക്കൽ കോളേജ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ജൂലിക്ക് മൂന്നു മക്കളുണ്ട്.
