തിരുവനന്തപുരം: സ്വിഫ്റ്റ് ബസ് ഓടിക്കേണ്ട ഡ്രൈവർമാർക്ക് കാറിൽ ഡ്രൈവിങ്ങ് ടെസ്റ്റ് നടത്തി കെഎസ്ആർടിസി. തിരുവനന്തപുരം പാപ്പനംകോട് ഡിപ്പോയിലാണ് ഹെവി ലൈസൻസ് ഉള്ള വനിത ഡ്രൈവർമാർക്ക് കാറിൽ ടെസ്റ്റ് നടത്തിയത്. അടുത്ത മാസം മുതൽ നിരത്തിൽ സർവീസ് നടത്തേണ്ട കെഎസ്ആർടിസി സ്വിഫ്റ്റ് ബസിലെ ഡ്രൈവർമാരുടെ ടെസ്റ്റായിരുന്നു ഇത്.
ഹെവി ലൈസൻസ് വേണ്ട ജോലിക്കാണ് മാരുതി ഓൾട്ടോ കാറിൽ ടെസ്റ്റ് നടത്തിയത്. എച്ച് എടുക്കുന്നതും റോഡ് ടെസ്റ്റും എല്ലാം മാരുതി കാറിലാണ് നടത്തിയത്. തലതിരിഞ്ഞ നടപടി പിന്നാലെ നടന്ന് കെഎസ്ആർടിസി സ്വിഫ്റ്റ് ബസ് അധികൃതർ നിരീക്ഷിക്കുകയും ചെയ്തു. ഡ്രൈവർ തസ്തികയിലേക്ക് അപേക്ഷിച്ച 27 വനിതകളിൽ നിന്ന് തെരഞ്ഞെടുക്കപ്പെട്ട പത്ത് പേരെയാണ് ടെസ്റ്റിന് വിളിച്ചത്. ഈ പത്ത് പേർക്കും ഹെവി വെഹിക്കിൾ ഡ്രൈവിങ് ലൈസൻസുണ്ടായിരുന്നു. എന്നാൽ ഉദ്യോഗാർത്ഥികൾക്ക് തുടർ പരിശീലനം നൽകുമെന്നാണ് കെഎസ്ആർടിസി സ്വിഫ്റ്റിന്റ വിശദീകരണം.
